Plantun de Prouvènço

Pèr coumpara dos planto d'encò nostre

Rhinanthus pseudoantiquus & Malva moschata

Tartarèio(-fausso-antico)

Rhinanthus pseudoantiquus

Orobanchaceae Scrophulariaceae

Autre noum : Crèsto-de-gau.

Nom en français : Rhinanthe pseudoantique.

Descripcioun :
Aquesto tartarèio, o cresto-de-gau, es uno planto dins proun raro, soulamen couneigudo de quàuqui relarg proche dóu Mercantour. Se recounèis à si bratèio e sepalo bourrihudo e subretout à si flour que vènon roujo emé l'age. La dènt, vióuleto, de la labro d'en aut, a si bord redoun e fai de 0,5 à 0,8 mm. La planto èi proutegido en listo roujo, categourìo VU (vulnerablo).

Usanço :
Li crèsto-de-gau soun de planto parasito pas manjado pèr li bèsti. Caupon de rinantino empouisounanto que pòu servi contro la tavanìo. An peréu la prouprieta de tencha la lano e la sedo en jaune.

Port : Erbo
Taio : 5 à 15 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Rhinanthus
Famiho : Orobanchaceae
Famiho classico : Scrophulariaceae

Ordre : Lamiales

Coulour de la flour : Jauno
Petalo : irreguliero
Ø (o loungour) flour : 0,8 à 1,2 cm
Flourido : Printèms - Estiéu

Sòu : Ca
Autour basso e auto : 1700 à 2300 m
Aparado : Noun
Remarco : Endemico Aup marino
Jun à juliet

Liò : Pelouso - Esboudèu fin
Estànci : Subaupen à Aupen
Couroulougi : Ouroufito-Aupenco-Sud-Ouèst
Ref. sc. : Rhinanthus pseudoantiquus Kunz, 1969

Mauvo(-muscado)

Malva moschata

Malvaceae

Nom en français : Mauve musquée.

Descripcioun :
Aquesto mauvo, pas gaire coumuno au nostre, trachis dins li relarg umide en mountagno. Se recounèis à si gròssi flour roso (eici dèu èstre la varieta rosea, bessai escapado de jardin), à si fueio mai o mens retaiado, e majamen i fuioun de l'"epicalice" prim e de la loungour di sepalo.

Usanço :
Tóuti li mauvo soun manjadisso. Se manjon li jóuini racino e fueio e peréu li fru que dounon d'èr à de froumage. Tout acò èi bon pèr ajuda à caga, à toussi. Soun peréu de bon remoulissènt.